2022-09-25

TNLiveNews

Minute to Minute NEWS!

மரத்தின் அடியில் அமர்ந்து கல்வி கற்கும் மாணவ-மாணவிகள் – தினத் தந்தி

சாயல்குடி
கடலாடி அருகே பள்ளி கட்டிடம் சேதமடைந்து காணப்படுவதால் மரத்தின் அடியில் அமர்ந்து மாணவ-மாணவிகள் கல்வி கற்கும் நிலை ஏற்பட்டுள்ளது.
தொடக்கப்பள்ளி
கடலாடி அருகே கிடாக்குளம் கிராமத்தில் 1980-ம் ஆண்டு முதல் ஊராட்சி ஒன்றிய தொடக்கப்பள்ளி செயல்பட்டு வருகிறது. கடந்த 15 ஆண்டுகளுக்கு முன்பு இங்குள்ள பள்ளிக்கு பராமரிப்பு பணி மேற்கொள்ளப்பட்டது. ஆனால் தற்போது அப்பள்ளி முழுவதும் இடியும் நிலையில் உள்ளதால் மாணவ-மாணவிகள் கிடாக்குளம் கிராம கண்மாய் அருகே உள்ள மரத்தடியில் கல்வி கற்று வருகின்றனர்.
இதுகுறித்து மாணவ-மாணவிகளின் பெற்றோர் கூறுகையில், இந்த பள்ளியில் கிடாக்குளம், கிடாக்குளம் கொட்டகை, புரசங்குளம் கிராமப் பகுதியில் இருந்து 20 மாணவ-மாணவிகள் பயின்று வருகின்றனர். பள்ளிக்கு வரும் மாணவர்களுக்கு வகுப்பறை கட்டிடம் இல்லாதது அவர்களின் கல்விக்கு பாதிப்பை ஏற்படுத்தி உள்ளது. கிடாக்குளம் ஊராட்சி ஒன்றிய தொடக்கப்பள்ளி முழுவதும் இடியும் நிலையில் உள்ளதால் மாணவ-மாணவிகள் தற்போது கிராமத்தின் கண்மாய் கரையில் அமைந்துள்ள கருப்பன் கோவில் மரத்தடியில் பயின்று வருகின்றனர்.
நடவடிக்கை இல்லை
தற்போது மழை பெய்து கண்மாயில் தண்ணீர் அதிகமாக இருப்பதால் அப்பகுதியின் கரையில் மாணவ-மாணவிகள் நடந்து செல்ல முடியாத நிலை உள்ளது. மேலும் மரத்தடியிலும் கல்வி கற்க முடியாத நிலைக்கும் தள்ளப்பட்டுள்ளனர். ஆகையால் மாணவ-மாணவிகளின் கல்வி பாதிக்கக்கூடிய நிலை உருவாகி வருகிறது.
பள்ளியில் புதிய பள்ளி கட்டிடம் கட்டுவதற்கு பலமுறை அதிகாரிகளுக்கு மனு கொடுத்தும் நடவடிக்கை இல்லை. ஆகவே மாவட்ட நிர்வாகம் உடனடியாக மாணவ-மாணவிகளுக்கு மழை பெய்யும் முன் தற்போதைக்கு மாற்று கட்டிடமும், விரைவில் புதிய பள்ளி கட்டிடமும் கட்டித்தர நடவடிக்கை எடுக்க வேண்டும் என்றனர்.
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)

source