2023-01-29

TNLiveNews

Minute to Minute NEWS!

தேதி முடிஞ்சுது… அரசியல் அநாதையான அதிமுக… ஈபிஎஸ்க்கும் ’நோ’, ஓபிஎஸ்க்கும் ’நோ’! – Tamil Samayam

இந்நிலையில் 2021 சட்டமன்ற தேர்தலில் ஆட்சியை இழந்தது அதிமுக. இதன் தொடர்ச்சியாக உட்கட்சி கலகம் வெளிப்படையாக தெரிய ஆரம்பித்தது. ஓ.பன்னீர்செல்வத்தை ஓரங்கட்டி கட்சியின் தலைமை பொறுப்பை கைப்பற்ற எடப்பாடி பழனிசாமி பல்வேறு வியூகங்களை வகுத்தார். குறிப்பாக முதல்வராக பதவி வகித்த 4 ஆண்டுகளிலேயே தனக்கான அச்சாரத்தை வலுவாக போட்டிருந்தார்.
இது ஆட்சி நிறைவடைந்ததும் விஸ்வரூபம் எடுத்து ஓ.பன்னீர்செல்வத்திற்கு வினையாக வந்து நின்றது. அதுவும் ஜூலை 11ல் நடந்த அதிமுக பொதுக்குழு கட்சியின் பிளவை அதிகாரப்பூர்வமாக உறுதி செய்தது. இடைக்கால பொதுச் செயலாளர் எடப்பாடி பழனிசாமி, ஓ.பன்னீர்செல்வம் நீக்கம், ஆதரவாளர்கள் பிரிந்தது என அடுத்தடுத்த சம்பவங்கள் அரங்கேறி அரசியல் களம் அதகளமானது. இப்படியே 4 மாதங்கள் ஆகிவிட்ட நிலையில் ஒரு விஷயத்தை பலரும் மறந்துவிட்டனர்.

ஆமாம்… அதிமுகவின் தலைமை பொறுப்பில் அல்லது அக்கட்சியை தற்போது யார் நிர்வகிக்கிறார்கள்? தற்போது இந்த கேள்வி ஏன் வந்தது என்று நீங்கள் கேட்கலாம். அடுத்து வரும் விஷயத்தை கவனியுங்கள். எடப்பாடி பழனிசாமியின் தற்காலிக இடைக்கால பொதுச் செயலாளர் பதவி நேற்றுடன் காலாவதியாகி விட்டது. ஏனெனில் ஜூலை 11ஆம் தேதி (11.07.2022) நடந்த அதிமுக பொதுக்குழு கூட்டத்தில் எடப்பாடி பழனிசாமியை கட்சியின் இடைக்கால பொதுச் செயலாளராக உயர்மட்ட நிர்வாகிகள் ஒருமனதாக தேர்வு செய்தனர்.
இந்த தீர்மானம் அடுத்த 4 மாதங்களுக்கு மட்டுமே செல்லுபடியாகும் எனத் தெரிவிக்கப்பட்டது. அந்த வகையில் நேற்றைய தினம் (10.11.2022) எடப்பாடி பழனிசாமியின் பதவி முடிவுக்கு வந்துவிட்டது. முன்னதாக ஓ.பன்னீர்செல்வம் கட்சியின் ஒருங்கிணைப்பாளராக 2017 செப்டம்பரில் தேர்வு செய்யப்பட்டார். இந்த பதவி அடுத்த 5 ஆண்டுகளுக்கு செல்லுபடியாகும் எனக் கூறப்பட்டது.
அப்படி பார்த்தால் கடந்த செப்டம்பர் மாதமே ஓ.பன்னீர்செல்வத்தின் பதவிக்காலமும் நிறைவடைந்து விட்டது. இதன்மூலம் அதிமுகவை வழிநடத்தக் கூடிய தலைமைப் பொறுப்பில் தற்போது ஓபிஎஸ்சும் இல்லை. ஈபிஎஸ்சும் இல்லை என்று தானே அர்த்தம். அப்படியெனில் இருவரின் பேச்சும் எப்படி எடுபடும். அவரை சார்ந்த ஆதரவாளர்கள் வேண்டுமானால் கேட்கலாம். கட்சி என்ற விஷயத்தை அதிகாரப்பூர்வமாக யார் கையாள்வது? என்ற சிக்கல் எழுந்துள்ளது.

ஒருவேளை நீதிமன்றத்தில் மனு தாக்கல் செய்து தற்காலிகமாக யாரிடமாவது பொறுப்பை ஒப்படைக்கும் வகையில் ஏற்பாடு செய்யலாம். ஏற்கனவே பொதுச் செயலாளர் தேர்தல் நடத்தக் கூடாது என்று உச்ச நீதிமன்றம் இடைக்கால தடை விதித்துள்ளது. அதற்கும் வழியில்லை. எனவே தேர்தல் ஆணையத்தின் அங்கீகாரத்துடன் அதிமுகவை வழிநடத்தக்கூடிய அதிகாரம் தற்போது யாருக்கும் இல்லை என்பது பெரிதும் அதிர்ச்சி அளிக்கக் கூடிய விஷயமாக இருக்கிறது.

source