2022-11-29

TNLiveNews

Minute to Minute NEWS!

இதய நோய்களைத் தடுக்க 5 வழிகள் – தினகரன்

நன்றி குங்குமம் டாக்டர்

இன்டர்வென்ஷனல் கார்டியாலஜிஸ்ட் கோபு பி

இதயம் என்றுமே நாம் தூங்கும் போதும் நமக்காகத் துடிக்கும் அற்புதமான உயிர்ப்பொருள். இதயம் நன்றாக இருக்க வேண்டும் என்று எல்லோருமே நினைத்தாலும் என்ன செய்ய வேண்டும் என்பது குறித்த விழிப்புணர்வோ அதற்கான புரிதலோ நம் சமூகத்தில் மிகவும் குறைவு. உலகம் முழுவதும் இதய நலிவுகள் அல்லது இதய நோய்கள் இறப்புக்கான முக்கிய காரணங்களில் ஒன்றாக உள்ளன. இது முற்றிலும் தவிர்க்க முடியாதது என்றாலும், நீங்கள் இன்னும்கூட இதய நோய்களுடன் தொடர்புடைய பெரும்பாலான ஆபத்து காரணிகளைக் கட்டுப்படுத்தலாம். வயது அல்லது குடும்ப வரலாறு போன்ற காரணிகளை உங்களால் கட்டுப்படுத்த முடியாது என்றாலும், நீங்கள் குறைக்கக்கூடிய பல ஆபத்துக் காரணிகள் உள்ளன.

இந்த காரணிகளில் உணவு, உடல் செயல்பாடு மற்றும் ஆரோக்கியமான வாழ்க்கை முறை பழக்கவழக்கங்கள், கூடுதல் கலோரிகளையும் உடல் எடையையும் குறைத்தல் மற்றும் வழக்கமான உடல்நலப் பரிசோதனை ஆகியவை அடங்கும். ஒரு ஆரோக்கியமான இதயம் மற்றும் இதய நோய் அபாயத்தைக் குறைக்க, ஆரோக்கியமான வாழ்க்கை முறையை வாழ்வதன் மூலம் உங்கள் இரத்த அழுத்தம், இரத்த சர்க்கரை மற்றும் கொலஸ்ட்ரால் அளவைக் கட்டுக்குள் வைத்திருக்க முடியும்.

இதய நலிவுகளில் பல்வேறு இதய நோய்கள் அடங்கும்

*ரத்த நாளங்களின் அடைப்பு (கரோனரி தமனி நோய்)
*அசாதாரண இதய ஒத்திசைவுகள் (அரித்மியாஸ்)
*பிறப்பிலிருந்தே இதயக் குறைபாடுகள் (பிறப்பில் இதய நோய்)
*இதய தசை நோய்கள் (கார்டியோமயோபதி, மயோகார்டிடிஸ்)
*இதய வால்வு நோய்
*இதயத்தில் தொற்று (எண்டோகார்டிடிஸ்)
*மாரடைப்பு
*ஆரோக்கியமான இதயத்துக்கும் இதய நோய்களைத் தடுப்பதற்கும் நீங்கள் வேண்டாம் என்று சொல்ல வேண்டிய 5 முக்கிய காரணிகள் இங்கே:

மன அழுத்தம்

நாள்பட்ட மன அழுத்தம் உங்கள் இதயத்தில் எதிர்மறையான தாக்கத்தை ஏற்படுத்தும். உங்களைப் பாதுகாக்க மன அழுத்தத்திற்கு பல வழிகளில் எதிர்வினையாற்ற உங்கள் உடல் பயிற்சியளிக்கப்பட்டுள்ளது. உங்கள் உடல் அழுத்தமாக இருக்கும்போதெல்லாம், அது அட்ரினலின் மற்றும் கார்டிசோல் எனப்படும் ஹார்மோன்களை வெளியிடுகிறது. அட்ரினலின் உங்கள் இதய துடிப்பு மற்றும் இரத்த அழுத்தத்தை அதிகரிக்கிறது, மேலும் கார்டிசோல் இரத்த அழுத்தம், இரத்த சர்க்கரை அளவு மற்றும் கொழுப்பை அதிகரிக்கிறது.

எனவே, நேர்மறையான அணுகுமுறையைப் பேணுதல், தொடர்ந்து உடற்பயிற்சி செய்தல், ஓய்வெடுக்கும் மற்றும் சுவாசிக்கும் நுட்பங்களைப் பயிற்சி செய்தல், யோகாசனம் செய்தல், நண்பர்கள் மற்றும் குடும்பத்தினருடன் நேரத்தைச் செலவிடுதல் அல்லது உங்களுக்கு விருப்பமான வேறு எந்தச் செயலிலும் ஈடுபடுதல் போன்ற பல்வேறு வழிகளில் உங்கள் மன அழுத்தத்தை நிர்வகிப்பது முக்கியம்.

சர்க்கரை

அதிகப்படியான சர்க்கரை உட்கொள்வது இதயத்தை நேரடியாகவும் மறைமுகமாகவும் பல வழிகளில் பாதிக்கிறது, எனவே, உயர் இரத்த சர்க்கரை அளவு இதய நோய்களின் அபாயத்தை அதிகரிக்கிறது. காலப்போக்கில், அதிக சர்க்கரை உள்ள பொருட்களால் உடலில் கொழுப்புகள் குவிந்து, அது உடல் பருமனுக்கு வழிவகுக்கிறது. உடல் பருமன் இரத்த அழுத்தம், கொலஸ்ட்ரால் மற்றும் நீரிழிவு அபாயத்தை அதிகரிக்கிறது.

சர்க்கரை உடலில் அழற்சியை ஏற்படுத்தும், இது இதயம் மற்றும் இரத்த நாளங்களில் அழுத்தத்தை அதிகரிக்கும்.இந்தக் காரணிகள் அனைத்தும் இதய நோய் அபாயத்தை அதிகரிக்கின்றன. எனவே, இனிப்பு வகைகள், கேனில் அடைக்கப்பட்ட உணவுகள் மற்றும் இனிப்பு பானங்கள் போன்ற சர்க்கரை உணவுகளை குறைக்க வேண்டியது அவசியம்.

தூக்கமின்மை

நீங்கள் போதுமான தூக்கம் தூங்குவது உங்கள் இதய ஆரோக்கியத்திற்கு முக்கியமானது. நீங்கள் தூங்கும்போது, உங்கள் உடல் ஓய்வான நிலையில் இருக்கும், உங்கள் இரத்த அழுத்தம் குறையும். தூக்கமின்மையால் உங்கள் இரத்த அழுத்தம் நீண்ட நேரத்துக்கு உயர்வாக இருக்கும், இது இதய நோய்களின் அபாயத்தை அதிகரிக்கிறது.

காலப்போக்கில், மோசமான தூக்கம் அதிக மன அழுத்தத்திற்கு வழிவகுக்கிறது, ஆரோக்கியமற்ற பழக்கவழக்கங்கள் மற்றும் உணவுத் தேர்வுகள், இவை அனைத்தும் இதய நோய்களின் அதிக ஆபத்துடன் தொடர்புடையவை. எனவே, பெரியவர்கள் ஒவ்வொரு இரவும் குறைந்தது 7 மணிநேரம் தூங்குவது தேவை என்று பரிந்துரைக்கப்படுகிறது. தூங்குவதற்கும் எழுந்திருப்பதற்கும் சரியான நேரத்தைத் திட்டமிடுங்கள், அதை நீங்கள் கடைப்பிடிப்பதை உறுதிப்படுத்திக் கொள்ளுங்கள்.

உட்கார்ந்த வாழ்க்கை முறை

வழக்கமான உடல் செயல்பாடு இல்லாதது இதய நோய்களின் அபாயத்துடன் இணைக்கப்பட்டுள்ளது. நீங்கள் நீண்ட நேரம் உங்கள் உடலை அசைக்காமல் இருந்தால், அது மோசமான வளர்சிதை மாற்றம், எடை அதிகரிப்பு மற்றும் தமனிகளில் கொழுப்பு உருவாக்கத்திற்கு வழிவகுக்கும், இவை அனைத்தும் இதயத்தில் அழுத்தத்தை அதிகரிக்கும். உடலில் உள்ள மற்ற தசைகளைப் போலவே, நன்றாகச் செயல்பட இதயத்துக்கும் உடற்பயிற்சி/உடல் செயல்பாடு தேவை.

எந்த வகையான செயல்பாடும் இதயத்திற்கு நன்மை பயக்கும். ஒரு நாளைக்கு குறைந்தது 30 நிமிட மிதமான தீவிர உடற்பயிற்சியை இலக்காகக் கொள்ள முயற்சிக்கவும். வேகமான நடைப்பயிற்சி, குதி ஓட்டம், சைக்கிள் ஓட்டுதல், தோட்டக்கலை, படிக்கட்டுகளில் ஏறுதல் போன்றவை இதில் அடங்கும்.

புகைபிடித்தல்

நீங்கள் சிகரெட் புகையை உள்ளிழுக்கும் போதெல்லாம், 7000 க்கும் மேற்பட்ட நச்சு இரசாயனங்கள் உங்கள் உடலில் நுழைந்து, உங்கள் இதயம் மற்றும் உங்கள் உடலின் பிற பகுதிகளுக்கு ஆக்ஸிஜன் நிறைந்த இரத்தத்தை வழங்குவதில் குறுக்கிடுகின்றன. எனவே, உங்கள் உடலுக்கு போதுமான ஆக்ஸிஜனை வழங்க உங்கள் இதயம் கடினமாக உழைக்க வேண்டும். இது உயர் இரத்த அழுத்தம் மற்றும் உயர் இதயத் துடிப்புக்கு வழிவகுக்கிறது, இது இதய நோய்களின் அபாயத்தை அதிகரிக்கிறது.

இதய நோய்களைத் தடுக்க நீங்கள் எடுக்கக்கூடிய சிறந்த நடவடிக்கைகளில் ஒன்று புகைபிடிப்பதை உடனடியாக கைவிடுவதாகும். புகைபிடிப்பதை விட்டுவிடுவதற்கான பல்வேறு உத்திகள் குறித்த ஆலோசனைக்கு உங்கள் மருத்துவரிடம் பேசுங்கள். நீங்கள் எவ்வளவு சீக்கிரம் அதைக் கைவிடுகிறீர்களோ, அந்த அளவுக்கு உங்கள் இதயம் பாதுகாப்பாக இருக்கும்!

source